 |
| Produce ilatina |
Año VI +
de 35.000 accesos mensuales |
| A Coruña
Virtual Alcer |
Última
Actualización: 12-09-2001 |
|
ALCER
NOTICIAS
|
UNHA
MÁQUINA PERMITE FACE-LA DIÁLISE NA CASA
|
|
A nefróloga do Juan Canalejo Ana Rodríguez Carmona é pioneira na súa
utilización
Onte foi presentada en Madrid —no marco do XXXVI Congreso Anual da
Asociación Europea de Diálise e Transplante Renal— unha nova técnica
que lles permite ós enfermos renais crónicos realizaren a súa diálise
de forma automatizada no seu domicilio mentres dormen, o que incidiría
nun cambio notable da súa calidade de vida. A novidade deste método
consiste na súa enxeñería electrónica. O novo aparello foi
presentado polos laboratorios Baxter e Ana Rodríguez Carmona, nefróloga
do Hospital Juan Canalejo da Coruña, é pioneira na utilización desta
máquina.
A nova máquina (portátil e de pequeno tamaño) permítelle ó médico
programa-la información necesaria para o control da diálise e recibir
a través dun módem, vía Internet, a evolución do tratamento. "Desta
forma, a unidade de diálise do hospital ten amplo acceso á información
terapéutica, permitíndolles ós especialistas a identificación de
problemas e o axuste de prescricións, sen que sexa necesaria a
presencia do paciente'', explicou a nefróloga Ana Rodríguez. Segundo
esta experta, o método irase introducindo de forma progresiva na
Seguridade Social "sen ningún custo engadido para a Administración
nin para o enfermo''.
Ata agora —engadiu— os pacientes que realizaban diálise peritoneal
automatizada (utilizada en España desde principios dos noventa) tiñan
que gravar manualmente na máquina tódolos parámetros do tratamento
para logo face-los axustes necesarios. Con este novo programa (tipo
Windows), o paciente "simplemente ten que introduci-la tarxeta,
desde a súa casa, coa información persoal que xa programou o
especialista; entón, a tarxeta arquiva o tratamento completo, introduce
os cambios do programa e vai actualizando a información periodicamente'',
sinalou.
De tódolos pacientes sometidos a diálise, un 10% optou pola
automatizada no seu domicilio. Segundo datos presentados no Congreso de
Nefroloxía, en España existen uns 30.000 enfermos con insuficiencia
renal crónica, dos que uns 17.000 se someten a diálise (57%); mentres
que o resto foron transplantados (43%). Ademais, estímase que uns 4.500
pacientes ó ano inician calquera modalidade de diálise.
|
| |
 |
